الاثنين، 19 مايو، 2014

لاب توب ايسر حلو ولا لأ ؟؟

لاب توب ايسر حلو ولا لأ ؟؟

تجربتي مع شراء لاب توب :

في البدايه في سؤال مهم جدا لازم تسأله لنفسك ( انا هشتري لاب توب ليه ! ) – السؤال ده في غايه الاهميه , انا شخصيا بعد لما اشتريت لاب توب اكتشفت ان انا مش محتجاه في شئ و ان الكمبيوتر المكتبي مكفي احتياجاتي تماما
مين الي ممكن يكون محتاج يقتني لاب توب :
1- شخص بيبقي خارج المنزل فتره كبيره و بيحتاج يدخل علي كمبيوتر سواء للانترنت او لشغله .
2 – طالب بيبقي في جامعته وقت كبير و بيحتاج يكون معاه لاب توب علشان دراسته او لامر اخر .
3- شخص مش متوفر عنده مكان في منزله فبيوفر مساحه بانه يقتني لاب توب .
4- مهندس او طبيب او اي صاحب وظيفه بيحتاج لاب توب معاه علشان يقدر يتصفح عليه شغله و يساعده في اعماله .
وغيرها من الاحتياجات التي تستدعي شراء لاب توب , اما اذا كان الكمبيوتر الشخصي يقوم بتلبية كل احتياجاتك فهنا القرار يعود اليك .
– البداية كانت معايا في اني قررت اشتري لاب توب , طبعا قعدت ابحث علي الانترنت اشتري نوع ايه و امكانيات ايه و احترت اكثر لما وجدت انواع كثير جدا من انواع ماركات لاب توب
انواع موديلات الاب توب :

– تنوعت و اختلفت ماركات الاب توب و هحاول اني اذكر الانواع علي حسب فئات بناء علي خواص معينه , هرتب الانواع علي اساس الشهرة و القوة و السمعة .
1 – لاب توب ابل laptop apple .
2 – لاب توب سوني laptop sony .
3 – لاب توب ديل laptop dell2 .
4 – لاب توب توشيبا laptop toshiba .
5 – لاب توب اتش بي laptop hp .
6 – لاب توب لينوفو laptop lenovo .
7 – لاب توب ايسر laptop acer .
8 – لاب توب سامسونج laptop samsung .
9 – لاب توب اتش بي كومباك laptop hp compaq .
10 – لاب توب فوجيتسو laptop fujitsu .
11 – لاب توب اي ماشين laptop emachines .
وغيرها من انواع ماركات الاب توب المنتشره , بس ديه تعتبر اكثر انواع الاب توب اقبالا عليها و شهرة .
- نصائح اساسيه عند شراء لاب توب :

امكانيات مواصفات الاب توب :
الاب توب مثله مثل الكمبيوتر العادي بيتكون من معالج , مازبورد , هارد , شاشة , كارت الشاشه , رامات .
فلازم تبقي انت محدد ايه امكانيات الاب توب الي انت محتاجها علشان تحقق احتياجك من الاب توب و الي هيأثر علي العامل المادي في الشراء .
فمثلا تجد من يرغب في شراء الاب توب علشان يلعب عليه العاب هنا انت بتبقي مجبر انك تشتري لاب توب امكانياته عاليه سواء في المعالج او كارت شاشه او المازبورد لان في العاب حديثه بتحتاج ان الرامات تبقي 6 جيجا علشان تشتغل و كارت شاشه يكون مش انتل يكون اضافي مثل كارت شاشه نيفديا او كارت شاشة ati .
او مهندس معماري بيحتاج لتشغيل برامج معينه علي الكمبيوتر بتحتاج يكون المعالج عالي و كارت الشاشه و هكذا , و في حاله اخري تجد شخص مجرد احتياجه في الاب توب هو تصفح الانترنت و تشغيل بعض الافلام و الاناشيد فهنا بيبقي مش محتاج امكانيات عاليه .
– شئ اخر وهو حجم شاشة الاب توب , تجد اشخاص بيفضلوا ان شاشة الاب توب الصغيره مناسبه ليهم فبيشتروا لاب توب بشاشة 13.1 انش , اشخاص اخرين يجدوا الشاشة الكبيره مريحه ليهم سواء كانت 15 انش او 17 انش و خاصه الي بيشتروا الاب توب لتشغيل الالعاب عليه , فلازم تشوف ديه و ديه علي الطبيعه و تقرر ايه المناسب ليك .
– كارت الشاشة , بيبقي في نوعين من الاب توب , لاب توب بكارت شاشه انتل عادي , او لاب توب بكارت شاشه مخصص لجرافيك زي نيفديا او ati , طيب ايه الفرق ما بين الاثنين , الانتل بيبقي جيد لو هتستخدم الاب توب في التصفح و الامور العاديه و تشغيل الالعاب البسيطه , اما لو هتحتاج تشغل العاب بجرافيك عالي او برامج بتحتاج جرافيك عالي فهنا انت لازم تشتري لاب توب بكارت مخصص لذلك .
– لوحة المفاتيح , بيبقي في انواع من لوحة المفاتيح لوحة المفاتيح الكاملة او المختصره , برضه هنا بيرجع القرار ليك في ناس بتفضل النوع ده و في ناس بتفضل النوع الاخر و بتفرق في حجم و شكل الاب توب .
– الهارد , المساحه التخزينيه للاب توب بنلاقي لاب توب بهارد 320 جيجا او 500 جيجا او 750 جيجا او 1000 جيجا , هنا بترجع علي حسب استخدامك هل انت من النوع الي بيملي مساحه الهارد عنده بحيث انك تحتاج مساحه كبيره او مساحه صغيره بتبقي مناسبه ليك و بشكل عام معظم الاب توب بيبقي مساحة متوسط 500 جيجا .
تجربتي مع بعض انواع الاب توب :

– جربت اكثر من نوع من انواع الاب توب سواء استخدام شخصي ليا او من خلال احد الاصدقاء , وان شاء الله هيبقي في تجربه مفصله عن كل نوع
1 – تجربتي مع لاب توب اتش بي كومباك .
– كان اول لاب توب اشتريه في حياتي , كان موديل cq61 , تجربة لم تكن جيده بشكل كبير , كعادة اتش بي مشكلة السخونه الصارخه و الي بتمثل اهم طلب بيطلبه اي مشتري لاب توب انه يشتري لاب توب علي الاقل يكون بيسخن سخونه عادي , ولكن للاسف بيسخن بشكل سئ جدا وشوفت كزا جهاز نفس الموديل كلهم كده , وشئ اخر ان البطارية كان عمرها قصير جدا و مش بيستحمل الضغط الكبير و تشغيل الجيمز الكبيره و هيكله مش متين بشكل قوي .
2 – تجربتي مع لاب توب اتش بي بافليون .
– كان ثاني تجربه ليا في شراء لاب توب , وكالعاده اتش بي يبقي سخونه مصطلح واضح للاسف , الاب توب كان ممكن اقلي عليه بيض :D , بجد والله مش بهزار و خاصة نوع اتش بي بافليون , اخدت الاب توب لما اشتريته وقولت يمكن المشكله فيا انا و روحت مول عند صديق جاب ليا لاب توب ايسر و ديل و توشيبها و بتاعي و شغل كله في نفس الوقت بتاعي ميكملش ربع نصف ساعه و قلاقي الاب توب بيطبخ :D , وده اسوء شئ ان الاب توب يبقي بيسخن لا بتقدر تضعه علي رجليك و لا تبقي مستريح ولو شغلت لعبه بتعمل شويه ضغط يفصل و تفضل بقي تلف علي مروحه و تشتغل عليه جو الثلاجه و كده :D , مع العلم اني جربت لاب توب اتش بي بروك و مكنش فيه مشكله السخونيه بشكل واضح كان جيد و بيستحمل اتش بي بروك , بس الي كان عاجبني فيه شكله الجميل و الانسيابي بس يفيد بايه و في مشكلة السخونيه المعقده .
3- تجربتي مع لاب توب ديل .
– كنت قاعد مع صديق ليا في كافية و كان معاه لاب توب ديل 5521 , الاب توب شغلناه الساعه 6 مساءا و قمنا الساعه 12 بعد منتصف الليل و البطاريه كانت لسا شغاله و اصريت اني اشوف السخونيه بعد تشغيل و عمل ضغط 6 ساعات تفاجأت ان يكاد يكون مفيش اي سخونيه نهائيا و بصراحه عجبني جدا جدا و خاصه اني جربت كزا نوع من الديل و كان جيد جدا
ديه كانت تجاربي مع الاب توب الفعلية .
نصائح من اصدقاء و اصحاب محلات كمبيوتر :

– لازم يبقي عندك خبره كويسه و انت نازل تشتري الاب توب و تبقي عارف يعني ايه معالج و مازربورد و رامات و تحدد امكانياتك والا تستعين باحد من اصدقائك او اقاربك او مهندس كمبيوتر هو الي ينزل معاك اثناء الشراء علشان هيفيدك بخربته في الجزئية ديه .
– احذر من شراء لاب توب يكون عليه كلمه refurbished , واحد هيقولي الكلمه ديه معناها ايه , الكلمه ديه معناها ان الاب توب معاد تصنيعه , هتقولي يعني ايه , يعني انا اشتريت لاب توب بضمان وبعد لما اشتريته طلع فيه مشكله رجعته الضمان واخدت واحد تاني , الضمان بيبعت الاب توب للشركة المصنعه و بيصلحوه و بيباع مرة اخري .
– احرص علي شراء لاب توب جديد و ليس مستعمل , واذا كنت مصر علي شراء لاب توب مستعمل فيجب عليك ان تقوم بتعمل تست كامل ليه من المعالج و المازبورد و الرامات و الشاشة و البطاريه و كل قطعه بشكل جيد عند مختص .
– لازم تعرف ان مهما كانت امكانيات الاب توب مش في نفس استحمال جهاز الكمبيوتر المكتبي من الضغط في الالعاب و برامج الجرافيك و غيرها ,
– الاب توب مش سهل زي الكمبيوتر المكتبي في تغيير امكانياته فيما بعد فحاول علي قد ما تقدر تشتري امكانيات مش ضعيفه علشان هتضطر انك تبيع الاب توب لو حبيت تعلي امكانياته لان في قطع صعبه جدا في تغييرها زي المعالج و المازبورد و كارت الشاشه الداخلي و في قطع سهله التغيير زي الهارد و الرامات .
– ابتعد عن معالج AMD , في ناس ممكن تتفق معايا و ممكن ناس تعارضني بس انا جربت اكثر من لاب توب بمعالج AMD ووجدت ان بيبقي في ارتفاع ملحوظ في درجات الحرارة مقارنه بمعالج انتل .
– اكسسورات الاب توب مثل الماوس الوايرلس و مروحة المبرد و بخاخ تنظيف الشاشه و حافظ لوحة المفاتيح اسعارهم بتبقي بسيطه و بيفضل شرائهم للحفاظ علي الاب توب .

وفي الختام نتمني ان تكون تجربتنا اليوم قد نالت علي رضاكم مع الوعد بالمزيد من التجارب الهادفة و المميزة , واذا كان لديك اي افكار بخصوص تجربتنا اليوم مع شراء الاب توب  نسعد بطرحك لها في تعليق , او اذا كان لديك استفسار نسعد بالاجابة عليه .




هل تعلم هى موسوعة من المعلومات العامة و الاخبار فى جميع المجالات و يوجد اجابة على جميع الاسئلة و الالغاز

ليست هناك تعليقات:

إرسال تعليق